Бир арман бар, күндөрдү коштоп жүргөн.
Бир сезим бар, жан дүйнөм жоктоп жүргөн.
Бир адам бар, эх, сизге жетмек кайда,
Бар болгону көздөрү окшоп жүргөн.

Бир үмүт бар, эртеңге жолум улар,
Үмүт жолдо ураган сүйүү сарай.
Кайрыла кет, жолоочум, кайрыла кет,
Эски уранды жалгыздап ыйлап турар.

Бир куса бар, дилимди эзип жүргөн,
Ыйык жан, сиз, алыста сезип жүргөн.
Убалына, падышам, калдык, калдык,
Бир сүйүүнүн дербиштей кезип жүргөн…